|
前粵語片演員杜平今日80歲大壽，噚晚喺香格里拉搞生日會，宴請親友，佢同太太現身會場招呼親友，擺咗約12圍。
喺微博經常表現愛國心嘅溫兆倫，罕有咁返到香港賀契爺，佢單人照時都相當合作，不過傳媒想做訪問時，一埋嚟就問記者係邊間報館，一眾記者報上自己公司，佢就即話:「哦，咁我只可以同大家講聲，大家好。」然後絕塵而去，之後更只接受電視台及掛有內地咪牌嘅傳媒訪問。可能又驚俾傳媒問起佢愛國嘅問題，掀起紛爭啦。
而吳孟達達哥就話:「就過年，自己個灶要收起，準備休息，咁多年新年都唔喺香港過，今年會去大馬過，個女20歲，過澳洲讀大學，可能陪佢去。今日係老友叫到，一早12月已經約我啦，同阿媽食完團年飯就會離港。」
今日見到好多老朋友係咪好開心?達哥話:「係，有啲我都唔認得，又後生，好似苗金鳳咁多年仲keep得好好。」
記者話杜平都睇唔出80歲，達哥話最重要係「行多啲」，達哥話:「佢(杜平)每日都行2至3個鐘，百病不侵，行好緊要，我就做類似太極嘅，o依家身體都叫OK，睇緊中醫調理。」問佢會否支持星爺嘅《美人魚》?達哥好雀躍咁話:「一定會，會捧老友場，唔會拎贈券，會自己買飛。」
| 
發表於 2016-1-27 03:06:52
收藏