英式廣東話

petershum

香港中西合璧！唔講真係唔識！

原來好多香港俗語係源自「鷄腸」！ 香港人口中常用的一些廣東話形容詞和動詞，其實是源自英文， 今次舉十個常見例子：

1. 派頭：Pride（自豪、威風） 50年代，流行講「派頭」這個形容詞，即是「講派場、有威勢、夠舖張」的正面稱讚。 「派頭」來自英文「Pride」。 例句：「佢哋結婚，飛去法國古堡舉行婚禮，仲包埋所有親友機票食宿，真係夠哂派頭！」

2. 仆街：Poor guy（粗劣的人） 「仆街」經常被人誤以為是「動詞」：詛咒對方「仆喺條街度！」其實「仆街」是名詞，來自英文的「Poor guy」。 「Poor」不是「貧窮」的意思，而是「粗劣、低俗、破爛」的意思。 例句：「呢條友連80歲啊婆沖涼都裝！正一仆街！」

3. 薯嘜：Schmuck（笨人） 讚人叻仔就話佢smart，但係彈人蠢鈍就叫佢「薯嘜」！薯嘜並非源於「蕃薯的嘜頭」，「薯嘜」來自英文「Schmuck」， 除了形容愚笨之外，也可應用在老土的衣著上。 例句：「嘩！乜你仲著「大地牌」冷衫？咁薯嘜架！」

4. 花臣：Fashion（新款式） 80年代，一講到「花臣」，就是指新的gimmick（噱頭）。 即是「新招數、新花款、新點子」， 「花臣」來自英文「Fashion」， 例句：「哼！黔驢技窮！睇你仲有乜嘢新花臣吖？！」

5. 蝦碌：Hard luck（惡運倒楣）蝦碌泛指拍電影時的NG (即係No Good) 片段，所謂「蝦碌鏡頭」， 現實生活裏，蝦碌指忙中有錯，掛萬漏一，失之交臂。 「蝦碌」來自英文「Hard luck」，行衰運所以蝦碌！例句：「唔好意思，一時蝦碌，將你個master file delete咗！你要重新再打過呀！」

6. 老粒：Rob（搶劫） 90年代初，流行講「老粒」，即是搶劫。「老粒」並非指一粒很老的東西，「老粒」來自英文「Rob」， 例句：「咪鬱！老粒呀！快啲攞哂啲錢出嚟，唔係一刀捅瓜你！」

7. 符碌：Fluke（桌球術語：僥倖擊中） 「符碌」指不靠實際能力，幸運地達成目標、純粹僥倖彩數。「符碌」來自英文「Fluke」， 是但馬虎，隨便求其，但又能幸運地完成艱钜任務。例句：「臨尾一Q，俾佢符符碌碌咁打埋個黑柴入尾袋添！」

8. 唱錢：Change（貨幣找換） 當要使用另一個國家的貨幣，便要去找換店「唱錢」，「唱啲美金」、「唱啲英磅」、「唱啲人民幣」， 「唱錢」來自英文「Change」（日語叫兩替店）， 例句：「下個禮拜去倫敦旅行，而家趁英磅平，唱定啲錢先！」

9. 屙畢甩：All blood（屙血） 如果遇上麻煩、辣手難題、或者死路一條， 就會自嘆一句：「呢一鑊真係屙畢甩！」 「畢甩」來自英文「blood」， 在腸癌橫行的今天，「屙血」都咪話唔大鑊！例句：「嚇？你架Civic仔撞爛人哋架法拉利？你今次真係屙畢甩！」

10. 蛇 guare：Scare（驚嚇、恐懼）「蛇guare」形容人「騰雞，無膽，大驚少怪」， 「蛇guare」來自英文「Scare」， 例句：「你唔好咁蛇guare啦！乜都自己嚇自己一餐！」

再加油:
1. 臨時演員叫「茄呢啡」，來至「Carefree」這些演員不需太注重。
2. 印式廣東話「咕喱」，係英文 Coolie 同埋葡文發音嘅Koolie廣東話音譯。
3. 汽車泊車的「泊」字，來自Parking中的「Park」。
4. 形容靚女的「索」來自「Sharp」（明艷奪目），「條女好索！」＝「條女好Sharp！」
5. 發蹄騰（FRIGHTENED)...好驚。
6. 有D啤（DEPRESSED)...無心機做野。
7. 頻能（PANIC)...忙亂。
8. 爆格 (BURGLARY)...被人入屋盜竊。
9. 喊到飛呢發辣 (FULLY FLATED)...喊到很淒涼。
10. 信唔信我丙 (PUNCH) 你?...信唔信我打你?
11. 拗撬 (ARGUE)...爭執。
12. 木獨 (MOODY)...無心機唔出聲

還想去什麼殖民化, 去你條命。去了就無野好同你講!
以上資源來自網上轉載。

同場加映 - 廣東話潮語對聯:
1.  中間分界，升職最快
2.  唔係你死，就係我翻唔到屋企
3.  唔係猛龍唔過江，唔係豬扒唔化妝
4.  10蚊有3件，越著越大件
5.  早買早享受，遲買平幾舊
6.  你有你拼搏，我有我揮霍
7.  痴痴呆呆坐埋一枱，懸懸居居團埋一堆
8.  婚姻是爱情的墳墓，但冇婚姻的爱情死無葬身之地
9.  人係無咁容易死，但死起上嚟真係好容易
10.十個男人九個滾，第十個喺度諗緊
11.錢唔係問題，問題係冇錢
12.為兄弟可以兩脅插刀，為女人可以插兄弟兩刀
13.我唔係随便嘅人，但我随便起來唔係人
14.男人一有錢就變壞，女人一變壞就有錢
15.唔駛急，最緊要快
16.一串光陰一串金，再串俾人打鑊咁。