從前度的現任了解自己！

Nelsonlai

雖然同Ex唔再係戀人，但仍能再見亦是朋友，不過撞見佢同新女友一齊，總係覺得有啲不是味兒。要同呢位現任談笑自若可能有啲難度，不過你都可以喺佢身上了解自己多一啲。





當你見到Ex拖住新女朋友時，一定有千百個問題浮上腦海：點解佢可以咁溫柔體貼去對佢，以前就對我呼呼喝喝粗聲粗氣？佢條件唔見得比我好，點解佢會揀佢，我點會比唔上佢？ 以前叫佢陪我就諸多藉口，而家居然同佢如膠似漆，有無搞錯？

係嘅，你哋已經分咗手，唔再係一對，無論以前你點努力，呢段情就係開唔到花結唔到果。但而家佢哋就幸福快樂，而你哋以前就甜蜜過後水火不容，點解？答案簡單而殘酷，因為你唔係佢，你同佢係兩個完全唔相同嘅個體，拎自己同佢相比其實完全無意義。

眼見Ex同佢恩愛無比，對比你同佢最終走到分手嘅一步，確實係有啲難受，但你身邊將來都會出現一個新的他，更了解你、明白你，同其他人無得相比。

反而，你可以用「她」作為反思嘅工具，去更了解自己，整理思緒，用新鮮嘅態度向另一段愛情出發！從你Ex嘅現任嘅特質，你會發現Ex鍾意咩類型，而呢啲特質正好可能係你欠缺嘅。你唔使因為佢兩個去扭曲自己，你只係參考一下，從中發掘邊一類型嘅男人先適合你！

如果她是……

鄰家女孩：可愛甜美，小鳥依人，晚晚陪佢睇波
呢類女孩適合一啲喜愛循規蹈矩生活嘅男人。而你同佢唔成功，係因為你真正鍾意嘅，係能接受新意念、唔怕冒險嘅男人。

風情萬種：性感小野貓
男人對性感女性嘅着迷，因為佢想搵一個能強勢主導嘅女人，佢自己樂於被人牽着走。而你係唔需要作任何轉變，只要搵個有清晰目標嘅人就可以了。

平凡女生：不愛打扮，個性平庸
佢選擇了一個性格平穩而乏味嘅女生，顯示佢對於你嘅外表同聰明才智感到不可駕馭，難以喺你身上搵到滿足感。你需要嘅，係一個有品味、風趣幽默，可以同你平起平坐、旗鼓相當嘅佢。

社交花蝴蝶：FB朋友爆燈，夜夜笙歌
你嘅Ex愛熱鬧，愛受一群朋友擁擠，日日見面吹水都唔厭；而你就相反，鍾意有時同朋友相聚，注重心靈交流。搵個同你一樣愛低調、追求精神滿足嘅佢似乎會更合適你。