網上穿膠花

erict

　　小時候穿過膠花，老媽子買紅毛泥溝水加入汽水罐，楝起筷子篤袋鼠布公仔套，又在二坡坊見過婆仔剪牛仔褲線頭。那時候，香港正在起飛......

　　今天，不少美國及跨國公司不斷狀大，好多後勤工作(back office)，外判所謂第三世界國家，例如印度。由前台服務員到產品設計，應有盡有。其實，說穿了就係網上穿膠花。

　　但如果穿膠花穿得出色，分分鐘變巨人。在美國，有不少南美州移民及印度人乘勢而起，自家發展。有不少公司今天舉足輕重。我相信，曾幾何時，他們都係網上穿膠花。

　　曾受郭博士教導，強調一門深入。或者，因為，今天，不少南美州去美國的新移民或印度無根無依靠，走在美國這個民族大溶爐，原則上美國好多行業只講能力，不問出身。他們憑自己打拼，一步一步走到今天，其實比我現時的難度高十倍有多。以我觀察，美國是競爭性極大的社會，能者居之為先，的確是所謂淘金者的天堂。歐洲有些同類公司因為相對保守，發展其實不如美國一般快，但穩重，拾級而上，仍佔世界網上穿膠花一大席位。

　　感謝郭博士的祝福文之助，令我打開眼睛看世界。我到目前為止有沒有一丁點功夫？唔敢講有。但可以肯定的是，多角度看世情。純以搵食層面，比以前在較短時間內就判斷到那些公司可以合作，那些公司是搞笑，那些公司九成九做完個job唔找數，感覺上在判斷他們時避開咗好多潛在陷阱。

　　心念一轉，再打開眼睛，其實，何止網上穿膠花？以搵食嚟講，有好多層面係有搵銀機會，特別在網上，再配合現實生活碰到的事，因為，終歸結底都是人與人相處，接觸。冇錯，萬事起頭難，係好辛苦，但唔辛苦又點得世間財？更何況我目前冇咩功夫，也釋懷接受，唯有人家十個小時做完嘅我做夠十五個鐘，將勤補拙。其實，做十五小時也不見得係蝕底。如果你在那十五個小時當中邊做邊諗，邊做邊學，說不定找到當中那行業的要點。因為，好多新產品之所以成功，源於用家覺得舊產品好戇居，又不好用，不如自己試下整，及後，整整下整出彩虹，成為上市公司的例子如數家珍。又或者可以在工作時跟人家建立初步互信基礎，或可以為將來奠下更上一層樓的基石。其實，做多五小時你一定有著數，只不過好處不會在眼前馬上見到。

　　在日常生活，你要人家信任你，好多時都好難；但如果做到在網上人家相信你，不斷給你工作，難度之高我認為係日常生活的一百倍。要多人信你，例如一家公司給你一百美元一個月的散件工作為先。日子有功，你有1,000家公司相信你，你的收入就係天文數字。貫穿這過程的精要，就係誠信。在此再一次多謝郭博士不斷強調做人要有誠信。誠信就係最重要的個人資產，摸唔到聞唔到，但偏偏人哋就係信你，給你的工作數以千計也不為過。前兩天說的Google就係好例子。有咗個朵，正如有一網友說，無往而不利。

　　由天將解大任於斯人到好事多磨，我一直告訴自己，這就是磨練，這就是對自己的考試。留下一字一句。不時翻看，就係要不斷督促自己，非常感謝有天羅地網呢個平台。要有好功夫，才可以像關羽一樣過五關斬六將，為自己打天下。過程肯定好辛苦（其實玩得辛苦都係好玩，人生，何嘗不是一場遊戲？玩得出色玩得開心玩得辛苦仍要繼續玩，等於做得出色做得開心做得辛苦，人哋對你欣賞，其實性質又有咩分別？），但過後回想起，都是難以忘懷的回憶，更是別人拿不走的功夫，閱歷，獨家發售給自己。

楊灝貽

我都係望緊快D搞好個朵唔洗再跟人打工
同埋依家白手要靠外力開頭真係唔做得要租舖位嘅野, 係屋企開檔

erict

楊灝貽 發表於 2016-8-8 11:52
我都係望緊快D搞好個朵唔洗再跟人打工
同埋依家白手要靠外力開頭真係唔做得要租舖位嘅野, 係屋企開檔
...

　　你好。我檔嘢得唔得，我都唔敢講，唯有用心及用真誠做，加上薄利多銷，殺一浸客番嚟先。
　　因為我純粹買文字及知識，好慶幸無咗舖頭寫字樓的壓力，加上有家姐幫助，一人計短，二人計長。其實，你只要留心，網上係有好多機會，當然，機會係講緊適合你與否，再加上你的才能是否可以搬到網上。更重要的是，有冇人信你，因為講到底，不論係面對面談生意或網上談，最後扑鎚用你的服務，都係講緊對方信唔信你，呢樣嘢其實真係終生學習，而關係是一點一滴累積而來。而做生意，做人，做咩我覺得都係一樣，一言既出，駟馬難追。有講有做，一下唔好應承，一應承就要做到底。對方九成九唔係傻仔，如果見你有交帶，勇於承擔，對方一定會賞識你，委以重任，而唔係果D有著數就lam，一見唔對路又或者為眼前賺多三幾千而玩小聰明，想閃身，再用一大堆說話為自己開脫，利用有利於自己的觀點企圖說服自己。連自己都說服唔到自己，試問人哋經過呢單之後，會再信你嗎？
　　記憶中，好多猶太佬傾生意，銀碼係天文數字，真係坐低飲杯酒，閒話家常幾句，然後握手，deal！前提係，雙方早有深厚互信基礎。
　　祝你早日自立門戶，發大財。

wu_peace

人無信不立。

儘管開頭只是幹著像"穿膠花"般的手作仔，但只要信譽好，出品精，價格廉，假以時日，口碑一點一滴地建立起來，自會多人賞識，繼而發展成為小商號，以至大企業；業務一飛沖天，是指日可待的事。

加油！

楊灝貽

erict 發表於 2016-8-8 17:02
　　你好。我檔嘢得唔得，我都唔敢講，唯有用心及用真誠做，加上薄利多銷，殺一浸客番嚟先。
　　因為我 ...

自立門戶都好講際遇

我轉行待業個陣以前做落D客係要搵上門
而家叫得閒搵多個錢唔好係條街四圍遊蕩, 當做副業
好嘅成品當廣告都唔想比人知, 因為冇諗過做返個行
但整整下有人傳, 搵親你次次都斟茶遞水, 又冇乜壓力, 靈就OK
好過我以前同依家打工
一比較冇得唔諗自立門戶

erict

楊灝貽 發表於 2016-8-9 13:10
自立門戶都好講際遇

我轉行待業個陣以前做落D客係要搵上門

或者可以以呢個為基礎, 再諗下有咩地方可以發展. 我相信一定有出路. 祝你成功.