澳門最近出現女賭神，令巴黎人賭場聞風喪膽，網上還流傳一張照片，外表異常胸狠，不知是真是假。想起多年不見的賭徒友人Kelly，就趁機問她可否接受採訪，答案當然是斬釘截鐵的「不」，但敍舊則沒問題。Kelly本科念的是數學，後來交了個念物理的賭徒男友，從此兩人以賭博為業。
這天見面，雖然她堅拒採訪，但我還是開門見山問：「你唔會就係嗰個女賭神吓話？究竟點賭先可以贏到賭場呢？」
她說：「我當然唔係嗰個女賭神啦，其實我哋已經差唔多收山，呢行亦唔係外人想像中咁刺激好玩。你睇戲，成日見啲高手將啤牌飛嚟飛去，又出千又盛咁，其實唔使㗎。依家專業賭錢嘅人，多數靠數學同電腦。好似我哋咁，其實係先寫program，用電腦模擬個遊戲無數次，日日花四五個鐘頭做number-crunching，直至搵到一種可行又賺到錢嘅策略為止。你玩咩、邊度玩、點樣玩、幾時玩、花幾多錢玩，每一步都有得計，亦一定要計，所以職業賭錢唔會比一般專業容易，亦冇得靠運氣。」
我問：「花幾多錢玩都要計？點計？」
她答道：「呢樣好簡單，做得呢行一定識。你知唔知點解我叫Kelly呢？因為有條方程式叫Kelly criterion，即係bp減q再除以b，可以計到你依家用幾多成嘅本金落注，先可以達到最快速嘅增長。」
我笑着說：「你講Kelly criterion，令我諗起唐朝有句擲骰仔咒語，『伊帝彌帝，彌揭羅帝』，聽講念夠十萬次，你想要幾多點，就可以擲到幾多點。對於普通賭仔嚟講，你條formula分分鐘仲深過句咒語。可唔可以講個簡單啲嘅賭錢貼士？」
Kelly說：「貼士就冇嘞，道理有一個。我哋賭咗咁多年，發現贏面最大嘅遊戲，通常都係規則最複雜、最難畀你分析到嘅遊戲，所以賭博同人生一樣，最好嘅嘢永遠最難得到。」
女賭神這份工，應該比OL更枯燥。
